IMali eHlawulwayo yesikolo nokuNyenyiselwa

Imali ehlawulwayo yesikolo sisixa semali ekuvunyelwene ngaso ukuba sihlawulwe ngabazali ezikolweni, ijolise ekuphuculeni umgangatho wemfundo kubafundi. Imali ehlawulwayo yesikolo inokungaquki imali ehlawulelwa ukubhalisa, imali ehlawulelwa ulawulo okanye enye. Isikolo sinokungabizi mali ingaphezulu ngezifundo ezongezelelweyo ezikhethwe ngabafundi kwinkqubo yesikolo.

Ngokwe-SAASA zonke ii-SGB zezikolo zikarhulumente kufuneka zongeze kwinkxaso karhulumente, ngokubiza imali ehlawulwayo yesikolo kunye nokwenza ezinye iintlobo ezifanelekileyo zokunyuswa kwengxowa. Ilungelo lokungabizi mali ihlawulwayo yesikolo liphelela kuphela kwizikolo ezibhengezwe njengezingahlawulisi mali yasikolo. Amagama ezikolo ezingahlawulisi mali yasikolo aya kupapashwa kwiGazethi yePhondo kwaye indlela esetyenziswayo yokumisela ‘izikolo ezingahlawulisi mali yasikolo iza kusekelwa kwinqanaba lezoqoqosho loluntu olujikeleze isikolo.

Ingxowa-mali yesikolo yindibaniselwano yemali ehlawulelwa isikolo, imali yonyuso-ngxowa kunye neminikelo. Luxanduva lwee-SGB ukuqinisekisa ukuba yonke le mali igcinwa kwaye ilawulwe kwiakhawunti enye yebhanki. Akukho sikolo sikarhulumente kufanele sibe neakhawunti yebhanki engaphezulu kwenye.

Isikolo sikarhulunente sinelungelo lokuthatha amanyathelo omthetho ngokubhekisele kumzali ongayihlawuliyo imali ehlawulelwa isikolo, kodwa kuphela emva kokuba kusetyenziswe indlela yokumisela ukunyenyiselwa kwaye umzali kusafanele ukuba ayihlawule lo mali yesikolo ehlawulwayo. Umfundi kufuneka ahlale esesikolweni ngexa lisaqhuba ityala.

Umfundi ngeke akhutshelwe ngaphandle ekuthatheni inxaxheba kuzo naziphi na iinkqubo ezisesikweni zesikolo ngenxa yokungahlawulwa kwemali ehlawulelwa isikolo ngumzali. Isikolo asinakugcina ingxelo yeziphumo zomfundi ngenxa yokuba umzali engakwazi ukuhlawula imali ehlawulelwa isikolo.

Ukunyenyiselwa iNtlawulo yeMali eHlawulwayo yeSikolo

Ukunyenyiselwa intlawulo yemali ehlawulwayo yesikolo yindlela emiselwe ngurhulumente ukunceda abazali ukuba abantwana babo bafumane imfundo esemgangathweni, kungakhathaliseki mvelaphi okanye miqobo yabo yezemali. Unyenyiso kufuneka lubalwe kuqwalaselo olwenziweyo ukusukela ekuqaleni konyaka, ukuba ufanelekile umzali.

Abazali abangakwaziyo ukuhlawula imali ehlawulelwa isikolo kufuneka bafake isicelo kwi-SGB sonyenyiso olunemiqathango okanye olupheleleyo ekuhlawuleni imali ehlawulelwa isikolo. Iifomu zesicelo zinokufunyanwa kwi-SGB ngokuzicela kwinqununu yesikolo. Izikolo zikarhulumente kufuneka zibazise abazali ngendlela esetyenziswayo neenkqubo kwaye zibancedise ekufakeni isicelo sokunyenyiselwa ekuhlawuleni imali ehlawulelwa isikolo. I-SGB kufuneka yazise umfaki-sicelo ngesiphumo sesicelo ngokubhalwe phantsi kwiintsuku ezisi-7 emva kokuhlolwa kwesicelo sokunyenyiselwa.

Isikolo akufanelanga sibize imali ehlawulelwa isikolo kwiinkedama.

Ukuba ngaba umzali akoneliswanga sisigqibo se-SGB ngokunxulumene nokunyenyiselwa ngokupheleleyo okanye inxenye, unokubhena kwiNtloko yeSebe ngokubhekisele kwisigqibo sesikolo kwiintsuku ezingama-30 zokufumana isigqibo sesikolo. Luxanduva lwesikolo sikarhulumente ngasinye ukunceda abazali ekufakeni izibheno.

ImiRhumo ngokuziThandela

Nawuphi na umzali, kuquka abo banikwe naluphi na uhlobo lonyenyiso, banokwenza umrhumo ngokuzithandela kwingxowa-mali yesikolo. Imirhumo ingayimali, isisa okanye ngohlobo lwayo nayiphi inkonzo anokuyinika esikolweni umzali.

UNcedo kubaZali abenza iSicelo sokuNyenyiselwa

Isikolo ngasinye sikarhulumente siyakhuthazwa ukuba siseke iKomiti yeMali eHlawulwayo yeSikolo. Usihlalo wale komiti kufuneka abe lilungu le-SGB. Umsebenzi wekomiti kukulawula yonke imiba ephathelene nemali ehlawulelwa isikolo efana nokuqokelelwa kwemali ehlawulelwa isikolo, ukunika ingxelo kwi-SGB ngengeniso evela kwimali ehlawulelwa isikolo kunye nokunceda abazali bafake izicelo zokunyenyiselwa imali ehlawulelwa isikolo. Le komiti ithathela ingqalelo izicelo zokunyenyiselwa kwaye inike i-SGB iziphakamiso zayo.

Umzali, nokuba kungesiphi na isizathu, ofuna uncedo lokufaka isicelo sokunyenyiselwa okanye ukufaka isibheno, unokucela usihlalo wekomiti yemali ehlawulelwa isikolo okanye nawaphi na amalungu eKomiti yeMali eHlawulelwa iSikolo ukuba amncede ekwenzeni isicelo.

Ukuba akukho ncedo lunikwa umzali emva kokuba elucelile, inqununu yesikolo esibandakanyekayo kufuneka incede umzali kwisicelo okanye kwisibheno eso ukuba icelwe ukuba yenze njalo ngumzali. Akukho mfaki-sicelo unokukhatyelwa isicelo ngenxa yokuba ifomu yesicelo sakhe ingagcwaliswanga ngokupheleleyo okanye igcwaliswe ngokungachanekanga. IKomiti yeMali eHlawulelwa iSikolo kufuneka iphendule ngokubhaliweyo kubazali ngeziphumo zezicelo zabo kwiintsuku ezili-14 zokufaka isicelo.

IziBheno kuNyenyiso oluKhatyiweyo

Umzali osicelo sakhe saliweyo yi-SGB unelungelo lokufaka isibheno kwiNtloko yeSebe yelo phondo kwiintsuku ezingama-30 emva kokwaziswa ngeso sigqibo. Inqununu okanye iKomiti yeMali eHlawulwayo yeSikolo kufuneka imnike umzali eli thuba kunye noncedo ngokunika kunye nokucacisa ifomu yesibheno kumzali.

Umzali ofaka isibheno kufuneka anike iNtloko yeSebe oku:

Izizathu zesibheno kunye nalo lonke ulwazi olubalulekileyo oluphathelene nesibheno
INtloko yeCandelo iya kucela usihlalo we-SGB ukuba adlulisele kuye kwiintsuku ezili-14:

Ikopi yemizuzu yentlanganiso ye-SGB leyo sixoxwe kuyo isicelo. Naziphi na izimvo enqwenela ukuzenza i-SGB ngokuphathelene nesicelo. Naluphi na ulwazi olubalulekileyo kwisibheno.

INtloko yeSebe Iya:

Kwiintsuku ezili-14 emva kokufumana amaxwebhu kumzali iya kwazisa usihlalo we-SGB ngesibheno esifakiweyo, yazise i-SGB ukuba ayinako ukuthatha nawaphi na amanyathelo ngokubhekisele kumzali de sibe isibheno sicotshelwe kwiintsuku ezisi-7 zokwenza isigqibo ngesibheno eso, yazise i-SGB kunye nombheni ngokubhaliweyo ngesigqibo sakhe kunye nezizathu zokufikelela kuso.