UkuKhutshwa Kwakhona kweSatifiketi sikaZwelonke samaBanga aPhezulu

Faka isicelo sokukhutshwa kwakhona kwesatifiketi sematriki (utshintsho lweenkcukacha).

ISebe leMfundo esiSiseko okanye isebe lephondo lezemfundo liya kusikhupha kwakhona isatifiketi sematriki esineenkcukacha ezitshintshiweyo ngaphantsi kweemeko ezithile. 

Ukutshintsha ulwazi kwisatifiketi sakho sematriki, kufuneka ufake isicelo kwiCandelo leeMviwo leSebe lezeMfundo lePhondo laseMpuma Koloni ngokugcwalisa ifomu efanelekileyo (Isicelo soTshintsho / UkuLungiswa kweeNkcukacha zobuQu: IiMpazamo zoLawulo okanye iSicelo sokukhutshwa kwakhona kwesatifiketi samabanga aphezulu/NSC ngenxa yotshintsho lolwazi lobuqu: Utshintsho olusemthethweni). Kufuneka uye kwiofisi yesebe lezemfundo ekufutshane buqu ukuze wenze udliwano-ndlebe kunye negosa lalapho phambi kokuba benze utshintsho.  

Ungacela ingxelo yeziphumo ngexa usalindele ukukhutshwa kwesatifiketi sakho. Fumanisa ngokungaphaya malunga nokukhutshwa kwakhona kwesatifiketi sematriki okanye uqhagamshelane neCandelo leeMviwo ku-043 604 7712/95.

Ukukhutshwa kwakhona: IiMpazamo zoLawulo

Kwithuba leenyanga ezintandathu ezisemva kokukhutshwa kwesatifiketi (ukukhutshwa okokuqala), kodwa ungedlulanga unyaka emva koviwo lokugqibela, isicelo sokukhutshwa kwakhona siya kuthathelwa ingqalelo kwiimeko apho ubungqina obaneleyo bokuba impazamo ekwisatifiketi, mhlawumbi ngokuphathelene namanqaku esifundo, ukhetho lwesifundo okanye utshintsho kwisiphumo, okanye umba weenkcukacha zobuqu, azichanekanga ngenxa yempazamo yobhaliso sisikolo okanye lisebe.

Ukukhutshwa kwakhona: UTshintsho lweNkcazo yesini kunye neMo yeSini

Kwimeko apho uMlawuli Jikelele weSebe leMicimbi yezeKhaya avume isicelo ngokomThetho weNkcazo yoTshintsho lweSini nemo yeSini, 2003, kwaye inkcazo yesini yomntu itshintshwe ngokufanelekileyo, umntu, ngeSebe leMfundo esiSiseko okanye iSebe lezeMfundo lePhondo, unokwenza isicelo sokukhutshwa kwakhona kwesatifiketi sinotshintsho lwegama/iinkcukacha zobuqu (ukuba kuceliwe), kunye nokunikwa kwakhona kwenkcazo yesini kuvimba weenkcukacha weBhunga loQinisekiso loMgangatho Jikelele kunye neMfundo noQeqesho olungaPhaya (kaMalusi).

Amaxwebhu Afunwayo

- Iikopi eziqinisekisweyo zamaXwebhu eSazisi esidala nesitsha somntu obebhala

- Ingxelo efungelweyo echaza ngokubanzi (iafidavithi) eyenziwe ngumntu obebhala

- Isatifiketi sokuqala

- Ifomu yesicelo efunyanwa kwi-DBE/PED

- Ileta evela kwiSebe leMicimbi yezeKhaya eqinisekisa ukuba, egameni lomntu obandakanyekayo, liqinisekisa ukuba lenze ngokweCandelo 27(A) lomThetho wokuBhaliswa kwabaZelweyo nabaSwelekileyo, 1992, kwaye liyitshintshile inkcazo yesini (namagama) yaloo mntu.

Omele ukwenze

Hlawula imali ehlawulwayo emiselweyo ngepostal oda ePosini, ikheshi kwiofisi ye-DBE/PED okanye ngetsheki.

Yiya kwiiofisi ezikufutshane ze-DBE/PED nala maxwebhu alandelayo:

- Isatifiketi sakho sokuqala sikazwelonke/samabanga aphezulu kunye nekopi eqinisekisiweyo

- Uxwebhu lwesazisi (ID) kunye nekopi eqinisekisiweyo ye-ID yakho

- Ingxelo efungelweyo exela izizathu zotshintsho (echaza ngokubanzi)

- Ileta eqinisekisayo evela kwiSebe lezeMicimbi yeKhaya

- Isatifiketi sokuzalwa, ikhadi lasekliniki okanye isatifiketi sokuphehlelelwa

Kuthatha ixesha elingakanani?

Kuthatha iiveki ezine ukuya kwezintandathu ukuKhutshwa kwakhona kwesatifiketi

Kubiza malini?

- Ukukhutshwa kwakhona kwesatifiketi: R73 de ibe ngowama-31 Matshi 2015

- Ingxelo yeziphumo: R26 de ibe ngowama-31 Matshi 2015

Uqhagamshelana nabani?

Iofisi kaZwelonke: 012 357 4511/13

EMpuma Koloni: 043 604 7709/73

ENtshona Koloni: 021 467 2483

KumNtla Koloni: 053 839 6585

KwaZulu Natal: 031 327 0538/0331

EFreyistata: 051 404 8000

EGauteng: 011 355 0588

KumNtla Ntshona: 018 384 3100/51

ELimpopo: 015 290 7747/7830